देशका अधिकांश ठाउँमा चिसो बढ्ने

काठमाडौं। देशका अधिकांश ठाउँमा चिसो बढ्ने जल तथा मौसम विज्ञान विभागको पूर्वानुमान छ।

विभागका अनुसार आगामी २४ घण्टामा देशका धेरै स्थानहरुको वायुको तापक्रममा गिरावट आउनेछ। साथै तराई भु-भागमा बिहानीपख हुस्सु लाग्‍ने र सडक तथा हवाई यातायात प्रभावित हुन सक्ने सम्भावना छ।

अहिले देशको पहाडी भू-भागमा आंशिक बदली रहेको छ। अन्य स्थानको मौसम भने सामान्यता सफा छ।

आज दिउँसो पहाडी भू-भागमा आंशिक बदली रही बाँकी भू-भागमा मौसम सामान्यतया सफा रहनेछ। राति भने सुदूरपश्चिम र कर्णाली प्रदेशको पहाडी भू-भागमा आंशिकदेखि सामान्य बदली रहने महाशाखाले जनाएको छ।

भोलि र पर्सि सुदूरपश्चिम र कर्णालीको पहाडी भू-भागमा आंशिक देखि सामान्य बदली रहनुका साथै त्यस प्रदेशका हिमाली भू-भागका थोरै स्थानमा हल्का हिमपातको सम्भावना रहेको विभागको भनाइ छ।