देवचुली सहित नवलपुरको सुकुम्बासी समस्या छिट्टै समाधान हुन्छ :मुख्यमन्त्री पोख्रेल

नवलपुर । देवचुली सहित नवलपुरको सुकुम्बासी समस्या छिट्टै समाधान हुने गण्डकी प्रदेशका मुख्यमन्त्री कृष्णचन्द्र नेपाली पोख्रेलले बताएका छ्न ।

बुधबार देवचुली नगरपालिकाको प्रशासकीय भवन र  प्रगतिनगर खानेपानीको ओभरहेड टयाङकी उदघाटन सत्रलाई सम्बोधन गर्दै मुख्यमन्त्री नेपालीले यस्तो बताएका हुन ।

सरकार परिवर्तन भए सँगै देवचुलीको मात्रै नभएर सिङ्गो नवलपुरको भुमिहिन जनताको काम अगाडी बढन नसकेको बताउदै मुख्य मन्त्री पोख्रेलले अब छिट्टैनै काम सुरु हुने बताए । राष्ट्रिय विकास समस्या समाधान समितीको बैठकमा र आफुले छुट्टै पनि भेटेर प्रधानमन्त्रीलाई नवलपुरका भुमिहिनको समस्या बारेमा अवगत गराउदा प्रधानमन्त्रीले एक दुई दिनमै काम सुरु गर्ने जानकारी दिएको मुख्यमन्त्रीले बताए ।

कार्यक्रमलाई सम्बोधन गर्दै मुख्यमन्त्री पोख्रेलले संघीयतामा गएपछि स्थानीय तहमा विकासका कार्यले फड्को मारेको समेत बताएका छ्न । उनले संघीयता आएको ५ बर्षमा स्थानीय तहले बाटोघाटो, पुलपुलेसो, विभिन्न संरचना निर्माण गरेको र त्यो संघीयता आएपछि मात्रै सम्भव भएको बताउदै यो संघियताको कारणले भएको बताए । पोख्रेलले भने,”संघीयता नै एउटा यस्तो व्यवस्था हो जसले विकासलाई अगाडि बढाउँछ, किनभने हिजोका दिनमा सिंहदरबारबाट २० लाख रुपैंया ल्याउन कति मेहेनत गर्नुपथ्यो तर अहिले सजिलै ल्याउन सक्छौँ ।”

मुख्यमन्त्री भएपछि पहिलो पटक आँफूले गण्डकी प्रदेश भरिका स्तन र पाठेघर क्यान्सर भएका महिला दिदीबहिनीहरुको उपचार खर्च सरकारले बेहोर्ने साथै कोरोनाबाट मृत्यु भएका परिवारलाई ५० हजार, अभिभावक गुमाएका बालबालिका हरुलाई महिनाको ५ हजार पढाई खर्च, बेसाहारा भएका व्यक्तिहरुलाई मानवसेवा आश्रममा राख्ने व्यवस्था गरिएको बताएका पोख्रेलले नवलपुर जिल्लामा पूर्वाधार विकासका धेरै कामहरु भइरहेको र यसलाई सफल पार्न आँफु लागि रहने समेत प्रतिबद्धता व्यक्त गरे ।