कावासोती

गण्डकी प्रदेश खेलकुद परिषदका नवनियुक्त सदस्य सचिव श्रीधर शर्माले आफ्नो सम्बन्धमा भ्रमपूर्ण समाचार प्रकाशन गरिएको भन्दै खण्डन गरेका छन । खेलकुद परिषद्को सदस्य सचिवमा हालै मात्रै नियुक्त भएका शर्माले सार्वजनिक लाभको पद ग्रहण गरेको भन्दै एक सञ्चार माध्यममा प्रकाशित समाचार आधारहिन भएको बताए ।

नवलपरासी पूर्वको मध्यविन्दु नगरपालिकामा रहेको कोल्हुवा खानेपानी संस्थाको अध्यक्ष रहेका भएका शर्माले सेवासुविधा बुझिरहेको भन्ने प्रकाशित समाचारमा सत्यता नरहेको भन्दै समाचारको खण्डन गरेका हुन । अध्यक्षको रुपमा २०७९ पुस १ गतेबाट कुनैपनि सेवासुविधा नलिने गरी निर्णय भएको भन्दै उनले सदस्य सचिव पदमा दरखास्त दिदा कुनैपनि सार्वजनिक  लाभ ग्रहण नगरेको दावी गरेका छन ।

उनले समाचार प्रकाशन पूर्व सम्बन्धीत व्यक्ति स्वयम् संग समेत कुनै विषय नबुझि समाचार प्रकाशित भएको भन्दै यसबाट भ्रमित नहुन समेत अनुरोध गरेका छन । उनले खानेपानी संंस्था सेवामुलक संंस्था भएका कारण पदाधिकारीले तलब लगाएतको कुनै सेवा सुबिधा लिने नगरेको समेत प्रस्ट पारे । शर्माले बैशाख २१ गते खानेपानी संंस्थाका उपाध्यक्ष शुबासचन्द्र नेपाललाई कार्यवाहकको जिम्मेवारी हस्तान्तरण गर्दै  अध्यक्षको हैसियतमा नरहने गरि संस्थाबाट अलग भएको बताएका थिए ।

कोल्हुवा खानेपानी तथा सरसफाई उपभोक्ता संस्थाले पनि अध्यक्षको रुपमा सेवारत रहदा  शर्माले तलब नबुझेको बिज्ञप्ति मार्फत प्रस्ट पारेको छ । संस्थाका कार्यवाहक अध्यक्ष सुबासचन्द्र नेपाल,ब्यवस्थापक(कार्यालय प्रमुख) हरि पोख्रेल,लेखापाल मन्दिरा आचार्यले संयुक्त हस्ताक्षर गरि निकालिएको बिज्ञप्तिमा अध्यक्षको रुपमा सेवारत हुँदा शर्माले तलबको रुपमा कुनै रकम नबुझेको बताईएको छ ।

नवलपरासी पूर्व मध्यविन्दु नगरपालिका निवासी शर्मा हालै मात्र गण्डकी प्रदेश खेलकुद बिकास समितिको सदस्य सचिव पदमा नियुक्त भएका हुन । भलिबल संघका केन्द्रीय सचिव रहेका भएका शर्मा भलिवलको राष्ट्रिय खेल समेत खेलेका थिए ।

यस अगाडी खगराज अधिकारी नेतृत्वको प्रदेश सरकारले कार्यकर्ता पोस्ने नीति बनाएर असक्षम ब्यक्तिलाई गरेको नियुक्ती विवादित भएपछि नयाँ सरकारले शर्मालाई सदस्य सचिव नियुक्त गरेको हो ।