प्रसंग हो, सप्तरीको छिन्नमस्ता गाउँपालिकाको । मंगलबार किसानका लागि ल्याइएको बिऊ बिजन वितरण गर्ने कार्यक्रम थियो । वितरण कार्यक्रममा अध्यक्ष र उपाध्यक्ष उपस्थित हुने नै भए ।
बैठकमा अध्यक्ष सूर्यनारायण मण्डलले केही वडामा मात्र बिऊ बिजन वितरण गर्ने सुनाए । तर, उनको उक्त योजनाविरुद्ध उपाध्यक्ष उषादेवी मण्डल उत्रिए । उपाध्यक्ष मण्डलले सबै वडामा दामासाहीका दरले बिऊ बिजन वितरण गर्नु पर्ने अडान लिइन् ।
तर, उनको कुरा अध्यक्ष मण्डलले मान्दै मानेन् । त्यसपछि विवाद सिर्जना भयो । बिऊ बिजन वितरण गर्ने विषयको विवाद अन्ततः गालीगलौ हुँदै हातपातको स्थितिमै पुग्यो ।
रिसले चुर भएकी उपाध्यक्ष मण्डल अध्यक्ष मण्डलमाथि जाइ लागिन् । कुर्सी उचालेर अध्यक्षमाथि प्रहार गर्न थालिन् । अध्यक्ष पनि के कम उनले पनि कुर्सी उचालेर उपाध्यक्षमाथि प्रहार गर्न थाले ।
दुबैबीचमा कुटाकुटकै क्रममा उपाध्यक्षले अध्यक्षको दुईवटा दाँत नै भाँचिदिइन् । दाँत भाँचिएपछि रगत बग्न थाल्यो तैपनि अध्यक्ष कुटपिटबाट हटेनन् । कुटपिटकै क्रममा अध्यक्षको हातमा पनि चोट लागेको छ ।
कुटपिटका क्रममा अध्यक्षको दाँत भाँचिए पनि उपाध्यक्षको हातमा मात्र चोट लागेको जिल्ला समन्वय समितिले जनाएको छ ।
अध्यक्ष उपेन्द्र यादव नेतृत्वको जनता समाजवादी पार्टीका हुन् भने उपाध्यक्ष त्यहीँ पार्टीबाट विभाजित भई निर्माण भएको लोकतान्त्रिक समाजवादी पार्टीका हुन् ।
मंगलबार किसानका लागि कृषि शाखा कार्यालयबाट गाउँपालिकाको बजेटबाट खरिद गरि ल्याइएको ५ सय बोरा बिऊ बिजन कसरी वितरण गर्ने भन्ने निर्णय नभई कुटाकुट भएको थियो ।
