टी-ट्वान्टी विश्वकप २०२४ मा स्थान बनाउन नेपालसामु केवल एक विकल्प !
प्रकाशित : २०७९ कार्तिक २१ गते १२:५२
काठमाडौँ- आईसीसीले गरेको निर्णयअनुसार सन् २०२४ मा वेस्टइन्डिज र अमेरिकामा संयुक्त रूपमा आयोजना हुने आईसीसी टी-ट्वान्टी विश्वकप क्रिकेटमा २० टिमको सहभागिता रहनेछ ।
त्यसमध्ये अहिले अस्ट्रेलियामा जारी टी-ट्वान्टी विश्वकपको शीर्ष ८ मा रहने टिमहरु भारत, पाकिस्तान, इंग्ल्यान्ड, न्यूजिल्यान्ड, अस्ट्रेलिया, दक्षिण अफ्रिका, श्रीलंका र नेदरल्यान्ड्सले २०२४ को विश्वकपमा स्थान सुरक्षित गरिसकेका छन् । त्यसैगरी, आयोजकको नाताले वेस्टइन्डिज र अमेरिकाले पनि विश्वकप खेल्ने सुनिश्चित भइसकेको छ ।
यसको अर्थ अब नेपालसामू विश्वकपमा स्थान बनाउने एक विकल्प मात्र बाँकी रहेको देखिन्छ । त्यो हो बाँकी ८ टिमका लागि हुने क्षेत्रीय छनोट । क्षेत्रीय छनोट भई अफ्रिकाबाट २ टिम, अमेरिकाबाट १ टिम, एसियाबाट २ टिम, इस्ट-एसिया प्यासिफिकबाट १ तथा युरोपबाट २ टिमले विश्वकपमा स्थान बनाउनेछन् ।
एसियातर्फ रिजनल फाइनल अघि दुई वटा सब-रिजनल छनोट प्रतियोगिता हुनेछन् । सब-रिजनल छनोट प्रतियोगिताबाट दुई टिम रिजनल फाइनलमा खेल्नेछन् ।
नेपालले भने सिधैँ रिजनल फाइनल खेल्नुपर्ने हुन्छ र यहाँ नेपालले युएई, ओमान, हङकङ, सिंगापुर र बहराइन जस्ता टिमसँग खेल्दै शीर्ष दुईमा पर्नुपर्ने हुन्छ ।
Facebook Comment