राजस्थान रोयल्सको रोमाञ्चक जित
प्रकाशित : २०७९ वैशाख ६ गते १०:१०
काठमाडौं । जोश बट्लरले शतक बनाउनुका साथै युजभेन्द्र चाहलले ह्याट्रिकसहित पाँच विकेट लिएपछि राजस्थान रोयल्सले सोमबार राति इन्डियन प्रिमियर लिग (आईपीएल)मा कोलकाता नाइट राइडर्समाथि ७ रनको रोमाञ्चक विजय हासिल गरेको छ ।
बट्लरले १०३ रन बनाएपछि टस हारेर ब्याटिङका लागि निम्त्याइएको राजस्थानले निर्धारित २० ओभरमा पाँच विकेट गुमाएर २१७ रन बनाएको थियो । चाहलले ह्याट्रिकसहित पाँच विकेट लिएपछि २१८ रनको लक्ष्य पछ्याएको कोलकाताले १९.४ ओभरमा २१० रन बनाउँदा सबै विकेट गुमायो ।
मुम्बईको ब्राबौर्नी रंगशालामा बट्लरले ६१ बलमा ९ चौका र ५ छक्कासहित १०३ रन बनाएका हुन् । उनले पहिलो विकेटका लागि देबदत्त प्याडिकलसँग ९७ रनको साझेदारी गरेका थिए । त्यस्तै सञ्जु सामसनसँग दोस्रो विकेटका लागि ६७ रनको साझेदारी गरे । प्याडिकलले २४ रन बनाए भने कप्तान सामसनले ३८ रन जोडे ।
बट्लरले सिमरोन हेटमेयरसँग तेस्रो विकेटका लागि १९ रनको साझेदारी गरे । जारी सिजन बट्लरको यो दोस्रो शतक हो । यसअघि उनले मुम्बई इन्डियन्सविरुद्ध ६८ बलमा ११ चौका र ५ छक्कासहित १०० रन बनाएका थिए । जारी सिजन आईपीएलमा शतक बनाउने बट्लर र केएल राहुल दुई जनामात्र हुन् । लखनउ सुपर जायन्टका कप्तान राहुलले मुम्बईविरुद्ध १०३ रन बनाएका थिए ।
१६.४ ओभरमा बट्लर आउट हुँदा राजस्थान १८३÷३ को स्थितिमा थियो । त्यसपछि हेटमेयरले अविजित २६ रन बनाए भने रियान परागले ५ तथा करुन नायरले ३ रन बनाएर आउट भए । रविचन्द्रन आश्विन दुई रनमा अविजित रहे ।
Facebook Comment