सवारी दुर्घटना : ६ जनाको मृत्यु
काठमाडौं । काठमाडौं, झापा, सिरहा, बैतडी र रुपन्देहीका छुट्टाछुट्टै स्थानहरूमा भएको सवारी दुर्घटनामा परी ६ जनाको मृत्यु भएको छ ।
काठमाडौ महानगरपालिका-१४ वल्खुस्थित सडकमा बा.२१ च ५०६४ नम्बरको पिकअप भ्यानको ठक्करबाट पैदलयात्री नवलपरासी (पूर्व) देवचुली नगरपालिका-१४ घर भएका २७ वर्षीय ज्ञानु अधिकारीको बुधवार साँझ मृत्यु भएको छ ।
ठक्करबाट गम्भीर घाइते भएका उनको वयोधा अस्पताल बल्खुमा उपचारको क्रममा मृत्यु भएको हो । भ्यान र चालकलाई प्रहरीले नियन्त्रणमा लिएको छ ।
त्यस्तै झापा बिर्तामोड नगरपालिका-५ पूर्व धर्मकाटास्थित सडकमा बा.२१ च ५९३६ नम्बरको कारको ठक्करबाट पैदलयात्री सोही ठाउँस्थित अन्नपूर्ण चोक बस्ने २८ वर्षीय राजेन्द्र चौधरीको बुधवार राति मृत्यु भएको छ । दुर्घटनामा गम्भीर घाइते भएका उनको बीएन्डसी अस्पताल बिर्तामोडमा उपचारको क्रममा मृत्यु भएको छ । कार र चालकलाई प्रहरीले नियन्त्रणमा लिएको छ ।
त्यस्तै सिरहा नरहा गाउँपालिका-३ स्थित सडकमा प्रदेश.२-०२-००१ त ०७६८ नम्बरको ट्याक्टरले ज.११ प २१७८ नम्बरको मोटरसाइकललाई बुधवार राति ठक्कर दिँदा मोटरसाइकल चालक सोही गाउँपालिका खोरिया टोल बस्ने ३० वर्षीय नईम साँको मृत्यु भएको छ ।
दुर्घटनामा गम्भीर घाईते भएको उनको उपचारको लागि मंगलम हेल्थ केयर सेन्टर मिर्चैयातर्फ लैजाने क्रममा बाटोमै मृत्यु भएको हो । मोटरसाइकल र ट्याक्टरलाई नियन्त्रणमा लिएर हाल फरार ट्याक्टर चालकको खोजी गरिरहेको प्रहरीले जनाएको छ ।
त्यस्तै सिरहा, लहान नगरपालिका(१ पडरियास्थित सडकमा मे.१ ख १६७५ नम्बरको बसले स.१० प ९८४९ नम्बरको मोटरसाइकललाई बुधबार दिउँसो ठक्कर दिँदा मोटरसाइकल चालक खोटाङ रुपाकोट मझुवागढि नगरपालिका(४ बस्ने ३० वर्षीय हिरालाल राईको मृत्यु भएको छ । दुर्घटनामा गम्भीर घाईते भएको उनको राउ स्मारक अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार खोटाङ हलेसी तुवाचुङ नगरपालिका-१ वासिङ बस्ने ३२ वर्षीय हिरा बहादुर राईको सोही अस्पतालमा उपचार भईरहेको छ । बस चालकलाई प्रहरीले नियन्त्रणमा लिएको छ ।
बैतडी सुर्नया गाउँपालिका-७ आलुगैरास्थित सडकमा से.१ ज ८४३ नम्बरको बलेरो जीप सडकबाट करिब १ सय मिटर तल खसेर बिहीवार बिहान दुर्घटना हुँदा जीप चालक बझाङ बुङगल नगरपालिका-११ बस्ने २६ वर्षीय घनबहादुर बोहराको घट्नास्थलमै मृत्यु भएको छ । साथै दुर्घटनामा घाइते भएका जिपमा सवार अन्य ३ जनाको जिल्ला अस्पताल डडेलधुरामा उपचार भइरहेको छ ।
त्यस्तै रुपन्देही देवदह नगरपालिका(१० चरङ्गे जङ्गलस्थित सडकमा ना.७ ख ९७०२ नम्बरको बसको ठक्करबाट पैदलयात्री तिलोत्तमा नगरपालिका-८ दिपनगरचोक बस्ने २४ वर्षीय बिनोद क्षेत्रीको बुधबार राति मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । बस र चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा स्थानीय आवश्यक उद्धार एवं थप अनुसन्धान भइरहेको प्रहरीले जनाएको छ ।
Facebook Comment