नारायणगढ-मुग्लिन सडक २४ घण्टादेखि ठप्प, तत्काल खुल्ने सम्भावना न्यून
प्रकाशित : २०८० असार १५ गते १४:२३
चितवन — नारायणगढ-मुग्लिन सडक पहिरोका कारण ठप्प भएको २४ घण्टा पार भएको छ । सामान्य अवस्था रहे पहिरो सफा गर्न अझै दुई तीन घण्टा लाग्ने डिभिजन सडक कार्यालयका अधिकारीहरूले बताए ।
‘हिजोदेखि खसिरहेको पहिरो सफा गर्न अझै दुई तीन घण्टा लाग्ला । त्यसमाथि पनि खस्ने सम्भावना भएको केही खण्ड देखिन्छ । यदि त्यो खस्यो भने गाडी चल्न गाह्रो होला । नभए दुई चार घण्टाभित्र बाटो खुल्ला,’ भरतपुरको डिभिजन सडक कार्यालयका प्रमुख रमेशप्रसाद पौडेलले भने ।
चितवनमा पानी खासै परेको छैन । सुख्खा जस्तो पहिरो खसेको हो । तुइन खोलामा पुल बनाउन पहाड ताछेको ठाउँबाट नभएर आडैमा तर नयाँ ठाउँबाट पहिरो खसेको हो । सो ठाउँमा पहिरो खस्ला भन्ने सोच्दै नसोचेको डिभिजन सडक कार्यालयका प्रमुख रमेशप्रसाद पौडेलले बताए । उनले भने, ‘यो वर्ष नारायणगढदेखि २० किलोमिटरपर मौरीपुल आडमा पहिरो आएर दु:ख देला भन्ने अनुमान गरेर मेसिनहरू त्यहाँ राखेका थियौँ । तर त्यता हैन सोच्दै नसोचेका नयाँ ठाउँमा पहिरो आयो ।’ बिहीबारसम्म दुईवटा मेसिनले काम गरिरहेकामा आजबाट दुइटा मेसिन थपिएको पौडेलले बताए ।
नारायणगढ-मुग्लिन सडकलाई एसियाली मापदण्डअनुरूपको दुई लेनको फराकिलो सडक बनाउन आठ वर्षअघि काम सुरू भएसँगै यो सडकमा पहिरोको समस्या सुरू भएको हो । सडक विस्तारको काम सकिएको साढे चार वर्ष बिते पनि वर्खा लागेसँगै पहिरोले दिने सास्ती सकिएको छैन ।
Facebook Comment