बुटवल-नारायणगढ ५० किमि कालोपत्र, वर्षाअघि दाउन्नेमा ४ किमि ढलान हुने
प्रकाशित : २०८१ चैत १७ गते १५:००
कावासोती । बुटवल-नारायणगढ सडक पूर्वी खण्डमा ५० किलोमिटर कालोपत्र भएको छ । दाउन्ने–गैंडाकोट खण्डको ६३ किलोमिटरमध्ये एकतर्फको ५० किलोमिटर कालोपत्र गरिएको हो ।
यस खण्डमा सबैभन्दा बढी यात्रुले सास्ती भोग्नुपर्ने दाउन्ने खण्डमा ४ किलोमिटर र घुमाउरो घुम्तीमा ४ किलोमिटर सडक वर्षा अगाडि नै ढलान गरिने आयोजनाका सूचना अधिकारी शिव खनालले बताए । वर्षा अगाडि नै पूर्वी खण्डको ६३ किलोमिटरमा एकतर्फी कालोपत्र सम्पन्न गर्ने गरेर कामलाई तीव्रता दिइएको आयोजनाले जनाएको छ ।
४० महिनामा सम्पन्न हुनुपर्ने सडक विस्तारको काम ६ वर्षमा ५८ प्रतिशत मात्र सम्पन्न भएको छ । लामो समयदेखि धुलो, हिलो र खाल्टाखुल्टीका कारण सास्ती भोगेका स्थानीयलाई अब भने केही सहज हुनेछ । जनस्तरबाट सडक निमार्णको काम छिटो गर्न राजमार्ग बन्ददेखि प्रधानमन्त्री र सरोकारवाला निकायलाई पटकपटक हारगुहार गरेका थिए । तर, निर्माण कम्पनीले रकम अभाव तथा विभिन्न कारण देखाउँदै काम ढिलो गरेको थियो । अहिले भने सडक विस्तारको काम तीव्र रुपमा भइरहेको छ ।
२०७५ चैतमा काम सुरु गरेर २०७९ साउनमा निर्माण सम्पन्न हुनुपर्ने थियो । तर, कोरोना, निर्माण सामग्रीको कारण देखाएर पहिलोपटक २०८० साउन ११ गतेसम्मका लागि म्याद थप भएको थियो । पहिलोपटक थप भएको म्यादमा पनि कामले गति नलिएपछि दोस्रोपटक ०८१ साउन ८ गते सम्म म्याद थप गरिएको थियो । तर दोस्रोपटक पनि काम सम्पन्न नभएपछि तेस्रो पटक ०८२ साउन ८ गतेसम्मका लागि म्याद थप भएको छ ।
Facebook Comment