दिउँसो र राति यातायात रोकेर दाउन्ने खण्डमा सडक बिस्तारको काम गरिने
प्रकाशित : २०८१ चैत २२ गते १८:३७
कावासोती । बुटवल-नारायणगढ सडक खण्ड अन्तर्गत दाउन्नेमा रातको समयमा यातायात रोकेर सडक विस्तारको काम हुने भएको छ। अहिले दाउन्ने खण्डमा पहाड काट्ने, पर्खाल लगाउने र कल्भर्ट निर्माणको काम भइरहेको छ, जसका कारण सवारीसाधन जाममा पर्नु र यात्रुलाई दुःखको सामना गर्नु परेको छ।
प्रशासनले सवारीसाधन सञ्चालनमा रोक लगाएर काम गर्न लागेको हो। धुलो र खाडलमा सवारीसाधन बिग्रने तथा सडक विस्तारको क्रममा जोखिम हुने भएकाले चैत २७ गते देखि चैत ३१ गतेसम्म दिनको ११ बजेदेखि ३ बजे सम्म र २०८२ वैशाख १ गते देखि वैशाख १५ गतेसम्म रातिको ११ बजेदेखि बिहान ५ बजेसम्म अत्यावश्यक बाहेकका सवारी सञ्चालनमा रोक लगाएर सडक मर्मत र सडक विस्तारको काम गरिने पूर्वी नवलपरासीका प्रमुख जिल्ला अधिकारी भविश्वर पाण्डेले बताए।
पश्चिम र पूर्वी नवलपरासीका जिल्ला समन्वय समिति, जिल्ला प्रशासन, सुरक्षा निकाय र सरोकारवालाले शनिबार दाउन्ने सडक खण्डको स्थलगत निरीक्षण गरेर यातायात बन्द गरेर सडक मर्मत तथा निर्माण गर्ने निर्णय गरेका हुन्। दाउन्ने खण्डको १४ किलोमिटर पार गर्न अहिले सवारी जामले ५ देखि ६ घण्टा लाग्ने गरेको छ।
Facebook Comment