गणतन्त्रको पक्षमा एमालेको नवलपुर सहित देशै भर जागरणसभा

कावासोती । संघीय लोकतान्त्रिक गणतन्त्रको पक्षमा नेकपा एमालेले नवलपुर सहित देशै भर  जिल्लास्तरीय जागरण सभा गरेको छ ।

नेकपा एमाले नवलपुरले पनि कावासोती-१६ डण्डामा रहेको थारु राष्ट्रिय संग्रहालयमा जिल्ला स्तरिय जागरण सभाको आयोजना गरेको छ ।

एमाले नवलपुरका अध्यक्ष जीवन श्रेष्ठको अध्यक्षतामा आयोजित कार्यक्रममा एमालेका केन्द्रीय सदस्यहरुले सम्बोधन गरेका थिए ।

सभालाई सम्बोधन गर्दै एमाले केन्द्रीय सदस्य एवम् नवलपुर इञ्चार्ज तिलक महतले नेपाली जनताको लामो बलिदानीपूर्ण इतिहासबाट प्राप्त गणतन्त्रमाथि कुनैपनि पक्षबाट हुने आक्रमण स्वीकार्य नहुने बताए ।

गणतन्त्रसँगै  नेपाली जनताहरुले प्राप्त गरेको अधिकार, उपभोग गरेको विकास र समृद्धि महत्वपूर्ण रहेको र गणतन्त्रको विकल्प गणतन्त्र नै हुने भन्दै  गणतन्त्रको विकल्प राजतन्त्र हुन नसक्ने बताए ।

जनताको शासनबाट व्यक्तिको शासन तर्फ जाने कुरा कल्पना बाहिरको विषय भएकाले अबको यात्रा समृद्धिको यात्रा भएको महतको भनाई थियो  ।

सभालाई सम्बोधन गर्दै एमाले केन्द्रीय सदस्य कृष्ण पौडेलले नेपालमा विभिन्न समयमा भएका राजनितिक परिवर्तनबाट हालको संघीय लोकतान्त्रिक गणतन्त्र स्थापना भएको र अबको  राजनिति जनताको जनजिवन परिवर्तन गर्न केन्द्रीत बन्नु पर्ने बताए ।

देशमा विभिन्न समयमा विभिन्न शक्तिहरुले निरङकुशता लाद्ने र जनतालाई दास बनाउन खोज्नेहरु प्रवृत्तिहरु देखिने गरेको स्मरण गर्दै पौडेलले त्यस्ता सबै प्रकारका प्रतिगमनहरुलाई जनताले असफल बनाउने बताए ।

कार्यक्रममा एमालेका अर्का केन्द्रीय सदस्य रविन्द्र अधिकारीले राजावादीहरुले चैत्र १५ गते गरेको उदण्डताले उनिहरुको मनस्थिति र उनिहरुको कार्यशैली जनतालाई बुझिसकेको बताए । व्यक्ति हत्या, नीजि तथा सार्वजनिक सम्पती माथिको लुटपाट र क्षति जस्ता कार्यको  भर्त्सना गर्दै उनले एमालेका प्रत्येक कार्यकर्ताले गणतन्त्रको पक्षमा बस्तीबस्ती सम्म जागरण चलाउनु पर्ने बताए ।

जागरण सभा अगाडी एमाले कार्यकर्ताको मोटरसाइकल र्‍याली डण्डाबाट सुरु भएर कावासोती र पुन: डण्डा पुगेर सभामा सहभागी भएको थियो ।