कावासोतीको हाटबजारमा बिक्रीका लागी राखिएको रायोको सागमा अत्याधिक मात्रामा विषादी

कावासोती । नवलपुर सदरमुकाम कावासोतीमा बेच्न राखेको रायोको सागमा अत्याधिक विषादी प्रयोग गरेको पाईएको छ । कावासोतीको हाट बजारमा बिक्रिका लागि राखिएको रायोको सागमा अत्याधिक मात्रामा विषादी प्रयोग गरेको पाईएको हो ।

विषादी परीक्षण प्रयोगशाला कावासोतीका नायव प्राविधिक सहायक विरेन्द्र भण्डारीले आज बिहान परीक्षण गर्दा चितवनका कृषक ईश्वर भण्डारीले उत्पादन गरेको रायोको सागमा ९९.०४० प्रतिशत कार्वमेट नामक विषादी र ९८.९६१ प्रतिशत प्रतिवन्धित अर्गानोफसफेट नामक विषादी भेटिएको जानकारी दिए ।

त्यस्तै मकवानपुरको पालुङका रामलाल भट्टराईले उत्पादन गरेको रायोको सागमा कार्वमेट नामक विषादी ९५.४७२ प्रतिशत र अर्गानोफसफेट नामक विषादी ७०.३६४ प्रतिशत भेटिएको र उक्त साग खान अयोग्य रहेको नायव प्राविधिक सहायक भण्डारीले बताए ।

उक्त साग जफत गरि नष्ट गरिएको प्रयोगशालाले जनाएको छ। कार्वमेट र अर्गानोफस्फेट ३५ प्रतिशतभन्दा कम हुँदा खान योग्य हुनेमा धेरै विषादी भेटिएको कावासोती नगरपालिका पशु विकास शाखा प्रमुख डा. टेकराज पौडेलले बताए ।

विषादी धेरै प्रयोग गर्ने र विषादी तरकारीमा हाले लगतै टिपेर बजारमा विक्रीका लागि लैजादा समेत विषादीको अवशेष धेरै हुने उनको भनाइ छ।

मौसमीभन्दा पनि बेमौसमी तरकारीमा विषादी बढी प्रयोग गर्ने गरिएको प्रयोगशालाले जनाएको छ ।

केन्द्रीय कृषि प्रयोगशाला हरिहर भवनका प्रमुख महेशचन्द्र आचार्यका अनुसार सरकारले २४ प्रकारका विषादी प्रयोगमा प्रतिवन्ध लगाए पनि भारतसँगको खुल्ला सिमानाका कारण नेपाल भित्रिएर किसानले प्रयोग गरेको पाइएको छ ।

तरकारी र फलफूलमा प्रयोग गरिएको विषादीबाट कृषक आफै बढी प्रभावित भएर क्यान्सर, मृगौलाको रोग, छालाको रोग, नपुंसकता लगायत विभिन्न समस्या देखिने कार्यालय प्रमुख आचार्यको भनाइ छ ।

त्यसैले विषादी प्रयोग गर्न परेको अवस्थामा सही समय, सहि परिमाण, सहि तरिका र सहि विषादी छनोट गरी प्रयोग गर्न उनको सुझाव छ ।