सन्जय भट्टराई/कावासोती । नेपाल पत्रकार महासंघका महासचिव रमेश विष्टले संविधान माथी कुनै किसिमको हस्तक्षेप भए पत्रकार महासंघले शसक्त प्रतिवाद गर्ने बताएका छ्न । नेपाल पत्रकार महासंघ पुर्वी नवलपरासी शाखाको प्रथम साधारणसभाको उदघाटन सत्रमा बोल्दै विष्टले यस्तो बताएका हुन ।

कार्यक्रममा बोल्दै प्रमुख अतिथि समेत रहेका विष्टले नेपालको प्रेस स्वतन्त्रता , अभिव्यक्ति स्वतन्त्रता, नागरिक अधिकार र लोकतन्त्रको रक्षाको लागि पत्रकार महासंघको सबै शक्ति  प्रयोग हुने बताए । नेपालको राजनीति घटनाक्रमलाई पत्रकार महासंघले नजिक बाट नियालेको बताउदै महासचिव विष्टले पछाडि फर्किने कुराको पत्रकार महासंघ सधै विपक्षमा रहने बताए । महासचिव विष्टले देशको वर्तमान राजनीतिक घटना क्रमले पत्रकारहरु आफ्नो व्यवसायिक दक्षता र पेशागत क्षमता अभिवृद्धिको काम छोडेर प्राप्त राजनैतिक उपलब्धि जोगाउन तर्फ लाग्नु पर्ने अवस्था आउन सक्ने भन्दै चिन्ता व्यक्त गरेका छ्न ।

यस्तै कार्यक्रम बोल्दै प्रेस युनियनका केन्द्रिय सभापति बद्री सिग्देलले  प्रधानमन्त्री केपि ओलिले निर्वाचन गराउन नचाहेको आरोप लगाए । प्रधानमन्त्री ओलिले वैशाख निर्वाचन घोषणा गरेर चुपचाप बसेको र उनिमा निरंकुश तरिकाले शासन चलाउने नियत देखिएको बताउदै सिग्देलले नेपालको प्रेस तोकिएकै समयमा निर्वाचन हुनु पर्ने र राजनैतिक दल जनताबाट ताजा जनादेश लिएर आउनु पर्ने पक्षमा रहेको बताए ।

नेपाल पत्रकार महासंघ पुर्वी नवलपरासी शाखाका अध्यक्ष होमराज रानाभाटको अध्यक्षतामा सम्पन्न उदघाटन सत्रमा पत्रकार महासंघका महासचिव रमेश विष्ट, प्रेस युनियनका केन्द्रिय सभापति बद्री सिग्देल , नेपाल पत्रकार महासंघका केन्द्रिय सदस्यहरु, प्रदेश पदाधिकारी, विभिन्न पेशागत संगठनका प्रमुख एवम् प्रतिनिधि, जनप्रतिनिधिहरु सरकारी कार्यालयका प्रमुख एवम् प्रतिनिधिहरुले शुभकामना मन्तव्य राखेका थिए ।

जिल्लाका ११ जना पत्रकार सम्मानित

नेपाल पत्रकार महासंघ पुर्वी नवलपरासीको शनिबार सम्पन्न साधारणसभामा जिल्लाका ११ जना पत्रकार सम्मानित भएका छ्न । साधारणसभामा जिल्लामा रहेर २० बर्ष पत्रकारिता गरेका नारायण शर्मा , होमराज रानाभाट , लाल कुमार भट्टराई , होमनाथ जैसी , महासंघका संस्थापक अध्यक्ष भुपेन्द्र भट्टराई, संस्थापक सहसचिव बिष्णु पाण्डे , गोबिन्द बिनोदीलाई प्रमाणपत्र सहित दोसल्ला ओढाइ सम्मान गरिएको छ ।

यस्तै महासंघले जिल्लामा कृयाशिल पत्रकारीता गरेका पत्रकारहरु राम कुमार श्रेष्ठ , दयाराम आचर्य र धनु भुसाललाई सम्मान गरेको छ । कार्यक्रममा नेपाल प्रेस युनियन नवलपुरका सभापति विरेन्द्र पराजुलीले आफना पिता स्व कृष्ण लाल पराजुलीको स्मृति स्थापना गरेका स्व.कृष्णप्रसाद पराजुली कृयाशिल पत्रकारिता पुरस्कार बाट नवीन पौडेललाई सम्मान गरिएको थियो ।

साधारणसभाले सचिव प्रेम न्यौपानेको सांगठनिक प्रतिवेदन र कोषाध्यक्ष ईश्वरीप्रसाद चापागाईंको आर्थिक प्रतिवेदन संशोधन सहित पास गरेको छ ।