रोजगारी खोज्दै दैनिक २२ सय १९ जनाले छोड्छन् देश
प्रकाशित : २०८२ वैशाख ९ गते ८:०२
कावासोती । वैदेशिक रोजगारीमा जानको लागि एक वर्षको अवधिमा आठ लाखभन्दा बढी नेपालीले श्रम स्वीकृति लिएका छन् ।
वैदेशिक रोजगार विभागले २०८१ वैशाख १ देखि चैत ३१ गतेसम्मको एक वर्षको अवधिमा उनीहरूलाई श्रम स्वीकृति प्रदान गरेको हो ।
विभागको तथ्यांकअनुसार वर्ष २०८१ मा कुल आठ लाख १० हजार १०८ जनालाई अन्तिम श्रम स्वीकृत दिइएको छ ।
श्रम स्वीकृति लिनेमा सात लाख २० हजार ७३५ पुरुष र ८९ हजार ३७३ महिला छन् । वैदेशिक रोजगारीमा जानको लागि श्रम स्वीकृति लिनेमा ११.०३ प्रतिशत महिला रहेका छन् ।
गत वर्ष सबैभन्दा बढी श्रम स्वीकृति मंसिर महिनामा जारी भएका थिए । उक्त महिना कुल ८४ हजार २२६ जनाले श्रम स्वीकृति लिएका थिए ।
विभागका अनुसार, २०८१ वैशाखमा ७० हजार ६३७, जेठमा ७२ हजार ८६१, असारमा ५८ हजार ७३६, साउनमा ५९ हजार ५७५, भदौमा ५७ हजार ४९३ र असोजमा ५३ हजार ५२५ जनाले वैदेशिक रोजगारमिा जान श्रम स्वीकृति लिएका थिए ।
यस्तै, कात्तिकमा ७० हजार ९९०, मंसिरमा ८४ हजार २२६, पुसमा ६७ हजार २५८, माघमा ७२ हजार ४४१, फागुनमा ६८ हजार ९६३ र चैतमा ७३ हजार ४०३ जनाले श्रम स्वीकृति लिएको विभागको तथ्यांकले देखाउँछ ।
वैदेशिक रोजगारीमा जानको लागि वर्ष २०८१ मा मासिक औसतमा ६७ हजार ५०९ जनाले श्रम स्वीकृति लिएका थिए । रोजगारी खोज्न विदेश जान चाहनेको संख्या दैनिक औसतमा दुई हजार २१९ जनाभन्दा बढी रहेको छ ।
Facebook Comment