स्थानीय तहको निर्वाचन : गैडाकोटको मेयरमा एमाले नेता गोपाल प्रसाद गौतमद्वारा उम्मेदवारी दिने घोषणा

नवलपुर । नेकपा एमाले नवलपुरका जिल्ला सदस्य गोपाल प्रसाद गौतमले आगामी बैसाख ३० गतेका लागि तोकिएको स्थानीय तहको निर्वाचनमा गैँडाकोट नगरपालिकाको मेयर पदमा उमेदवारी दिने घोषणा गर्नुभएको छ ।गैँडाकोटमा आज अपरान्ह सञ्चारकर्मीसँग छलफल गर्दै नेता गौतमले स्थानीय तहको निर्वाचनमा आफुले प्रष्ट योजना सहित मेयर पदमा उमेदवारी दिने तयारी गरेको बताउनुभएको हो ।

विगतको समिक्षा गर्दै आगामी दिनहरुमा सुधार गर्नु महत्वपूर्ण पक्ष भएको भन्दै नेता गौतमले पर्यटकिय र ऐतिहाँसिक महत्व बोकेको गैँडाकोट नगरपालिकालाई उत्कृष्ट बनाउन आफुले गैँडाकोट नगरपालिकाको नगरप्रमुख पदमा उमेदवारी दिने खुलासा गर्नुभयो ।

कानुन निर्माण गर्न नसक्नु, आर्थिक रुपमा पारदर्शी नहुनु, प्रशासनिक नेतृत्वको स्थायीत्व नहुनु, अविश्वास बढ्दै जानु, प्रादेशिक र संघीय सरकारसँग समन्वय नहुनु नगर भन्दा दललाई महत्व दिनु, हरेक कुरालाई राजनितिसँग जोड्नु र सहकारी मैत्री नगर बनाउन नसक्नु जस्ता कुराहरु वितेको पाँचवर्षमा गैँडाकोटमा भोगिएका र देखिएका समस्याहरु भएको मेयर पदका आकांक्षी गौतमको ठम्याई छ ।

यी सबैकुराको समाधान गर्नका लागि आफुसँग प्रष्ट भिजन भएको भन्दै उहाँले पार्टि नेतृत्वले उचित निर्णय गर्ने समेत विश्वास ब्यक्त गर्नुभयो ।
२०३६सालदेखि बामपन्थी आन्दोलन सँग नजिक रहेका उहाँ अखिल भारत नेपाल प्रवासी युनियनमा केहि वर्ष काम गरि २०४१सालमा पीएन क्याम्पस पोखराबाट अखिलको प्रारम्भिक कमिटी हुँदै राजनैतिक यात्रा सुरु गर्नुभएको थियो ।

हाल नेकपा एमाले नवलपुरका सदस्य समेत रहनुभएका नेता गौतम सहकारी विभाग प्रमुखका साथै गैँडाकोट वडा नं. ८ र ९ को ईन्चार्जको भूमिकामा समेत हुनुहुन्छ ।३० वर्ष लामो निजामति सेवाको सिकाईले प्रशासन सञ्चालन र कर्मचारी परिचालनमा दख्खल राख्ने क्षमताका गौतमले मेयर पदमा उमेदवारी दिने घोषणा गरेसँगै नया खालको तरंग सृजना भएको छ ।

यसअघि सार्वजनिक रुपमै हालका मेयर छत्रराज पाैडेलले पार्टीले टिकट दिए मेयरमा दाेहाेरिने ईच्छा राखिसक्नु भएकाे छ भने नेकपा एमालेका नेता यमुनाथ आचार्य र नगर अध्यक्ष षडानन्द लामिछानेले समेत चाहना राखेकाे एमाले स्राेतले बताएकाे छ ।