यस वर्ष देवघाट मेला नलाग्ने

चितवन, तनहुँ र नवलपुर जिल्लाको संगम रहेको देवघाटधाम कालीगण्डकी र त्रिशूली नदीको मिलनविन्दु हो । मेला व्यवस्थापनका लागि विभिन्न तयारीहरु पूरा भएको थियो ।

‘हामीले ९० प्रतिशत काम पूरा गरेका थियौं । तर पछिल्ला दिनहरुमा कोरोना संक्रमण ह्वात्तै बढेपछि चितवन जिल्ला प्रशासनले जे निर्णय गरेको छ, त्यसमा सहमत हुँदै यो वर्ष मेला नगर्ने निधोमा पुग्यौं,’ देवघाट क्षेत्र विकास समितिका कार्यकारी निर्देशक धिरन घिमिरेले भने । उनले रोगको जोखिमका कारण यो वर्ष देवघाट नआउन सर्वसाधरणलाई अपिल पनि गरे ।

चितवनमा पछिल्ला दिनहरुमा संक्रमण ह्वात्तै बढेको छ । चितवनमा आइतबारसम्म सक्रिय संक्रमितको संख्या जम्मा ८२ थियो । चितवन स्वास्थ्य कार्यालयबाट प्राप्त विवरणअनुसार बुधबार यो संख्या बढेर २४० पुगेको छ । २४ गतेसम्म जिल्लामा नौ जना संक्रमित थपिने गरेका थिए । त्यसपछि एकै दिन ४१, ४७ हुँदै बुधबार एकै दिन ८१ जना संक्रमित थपिएको स्वास्थ्य कार्यालयले जनाएको छ ।