नेपाली महिला क्रिकेट टोली ग्लोबल छनोटको नजिक

गत भदौ १४ बाट सुरु भएको प्रतियोगिता भदौ २३ गते सम्पन्न हुन्छ। कुल ११ वटा एशियाली राष्ट्रले प्रतिस्पर्धा गरेको छनोट प्रतियोगितामा नेपाल समूह ‘ए’ मा थियो। यो समूहमा यूएई, कतार, मलेशिया, भुटान र बहराइन थिए। समूह ‘बी’ मा चीन, हङकङ, कुवेत, म्यानमार र थाइल्यान्ड थिए। नेपालले पहिलो खेलमा आयोजक मलेशियालाई मुस्किलले पाँच रनले पराजित गर्‍यो। नेपालले पहिलो ब्याटिङ गरी ८४ रन मात्र जोड्न सकेको थियो। जबाफी ब्याटिङमा उत्रिएको मलेसिया एक समय जित नजिक पुगिसकेको थियो। तर २४ बलमा जितको लागि १७ रनमा त्र बनाउन बाँकी रहेको र ७ विकेट हातमा रहेको बेला नेपाली बलरहरुले उत्कृष्ट पुनरागमन गर्दै मलेसियालाई ७९ रनमा नै रोक्न सफल भए। अर्को खेलमा भने नेपालले बहराइनलाई सजिलै १० विकेटले पराजित गरेको थियो। पहिलो ब्याटिङ गरेको बहराइनलाई ३१ रनमा नै सीमित पार्दै टोलीले २.५ ओभरमा विना विकेटको नोक्सानी लक्ष्य पूरा गरेको थियो।

तेस्रो खेलमा भुटानलाई हराउन भने नेपाली महिला टोलीले धेरै सङ्घर्ष गर्नुपर्‍यो। पहिलो ब्याटिङ गरेको भुटानले जितको लागि ४० रनको सामान्य लक्ष्य दिएको थियो। तर नेपालका सुरुआती ब्याटरहरु कविता कुँवर, अश्मिना कर्माचार्य, इन्दु बर्मा र सम्झना खड्का शून्यमा आउट भएपछि नेपाल एकाएक दबावमा परेको थियो। तर नेपालले १३.२ ओभरमा सात विकेट गुमाउँदै लक्ष्य पूरा गर्‍यो। चौथो खेलमा कतारलाई नौ विकेटले पराजित गरेपछि नेपालको सेमिफाइनल यात्रा निश्चित भएको हो। कतारले दिएको ७५ रनको सामान्य लक्ष्य नेपालले १०.३ ओभरमा मात्र एक विकेटको क्षतिमा पूरा गरेको थियो।

शुक्रवार थाइल्यान्डलाई पराजित गर्न सके नेपाल पहिलो पटक ग्लोबल क्वालिफायरमा प्रवेश गर्नेछ। ग्लोबल क्वालिफायरमा एशियाबाट दुई, अफ्रिकाबाट दुई, यूरोपबाट दुई, अमेरिकाबाट एक र पूर्वी एशिया प्रशान्त क्षेत्रबाट एक गरी आठ राष्ट्र छनोट भएर आउनेछन्। यी आठ टोलीमा श्रीलङ्का र आयरल्यान्ड थपिने छन् र १० टोलीबीच ग्लोबल क्वालिफायर हुने आइसीसीले जनाएको छ। यी १० टोलीबाट शीर्ष दुई टोली विश्वकपमा छानिनेछन्। महिला विश्वकप क्रिकेट भने सन् २०२४ मा बाङ्गलादेशमा आयोजना हुँदैछ। महिला विश्वकपमा १० टोलीको सहभागिता रहने छ। हालसम्म महिला विश्वकपमा सहभागी हुने छ टोलीको टुङ्गो लागिसकेको छ। ती टोलीहरु अस्ट्रेलिया, इङ्ल्यान्ड, भारत, न्युजिल्यान्ड, दक्षिण अफ्रिका र वेस्ट इन्डिज हुन्।