नेपालमा १० वर्ष मुनिका ४ हजार ७३३ जना बालबालिका कोरोना संक्रमित
प्रकाशित : २०७७ कार्तिक १७ गते १५:५५
काठमाडौं- नेपालमा कोरोना भाइरस संक्रमितमध्ये १० वर्ष मुनिका चार हजार ७ सयभन्दा बढी बालबालिकामा संक्रमण देखिएको छ।
स्वास्थ्य तथा जनसंख्या मन्त्रालयका अनुसार १ लाख ७३ हजार ५ सय ६७ जना कोरोना संक्रमितमध्ये ४ हजार ७ सय ३३ जना बालबालिकामा कोरोना भाइरस संक्रमण देखिएको हो।
तीमध्ये एक हजार ९ सय ३६ जना बालिका रहेका छन् भने २ हजार ७ सय ९७ जना बालक रहेको मन्त्रालयले जनाएको छ।
सबैभन्दा बढी बाग्मती प्रदेशमा २ हजार २ सय ४३ जना १० वर्ष मुनिका बालबालिका संक्रमित भएका छन्।
त्यस्तै प्रदेश २ मा ४२३, प्रदेश ५ मा ५१५, कर्णाली प्रदेशमा २०५, प्रदेश १ मा ४५०, सुदूरपश्चिम प्रदेशमा ६ सय १० जना र सबैभन्दा थोरै गण्डकी प्रदेशमा १८७ जना, बालबालिका संक्रमित भएको मन्त्रालयले जनाएको छ।
ताप्लेजुङ, सोलुखुम्बु, भोजपुर, तेह्रथुम, पाँचथर, मनाङ, मुस्ताङ गरी ७ जिल्लामा अहिलेसम्म १० वर्ष मुनिका बालबालिकामा संक्रमण देखिएको छैन।
Facebook Comment