तनहुँमा जीपलाई ठक्कर दिएर पुलबाट खस्यो ट्रक, दुईजनाको मृत्यु

कावासोती ।पृथ्वी राजमार्गअन्तर्गत तनहुँको आँबुखैरेनी गाउँपालिका–१, आँधीखोलामा मंगलबार (आज) बिहान इँटा बोकेको ट्रक दुर्घटना हुँदा दुईजनाको मृत्यु भएको छ ।

ट्रकका चालक उदयपुरका ३० वर्षीय भेषराज पराजुली र सहचालक रौतहटका २८ वर्षीय विजय विश्वकर्माको मृत्यु भएको जिल्ला प्रहरी कार्यालय तनहुँका प्रहरी निरीक्षक मुनेन्द्र थापाले जानकारी दिए ।

डुम्रेबाट आँबुखैरेनीतर्फ जाँदै गरेको बा प्र ०१–००१ य १६५९ नम्बरको स्कोरपियो (जीप)लाई विपरीत दिशाबाट आउँदै गरेको ए २–०३००–१ केएच २४४८ नम्बरको ट्रकले ठक्कर दिएको थियो । ठक्करपश्चात् स्कोरपियो सडकमै रहेको र ट्रक पुलको बीचभागबाट खसेर दुर्घटना भएको थियो ।

स्कोरपियोमा सवार चारजना सकुशल रहेका प्रहरीले जनाएको छ । दुर्घटनाग्रस्त ट्रकलाई क्रेनको सहायताले तानिएको थियो । रासस