डेढगाउँ पुल निर्माण गर्न ताकेता

नवलपरासी पूर्व — कालीगण्डकी नदीमा आएको बाढीले भत्काएको डेढगाउँ पुल मर्मत गर्न सडक डिभिजन कार्यालयले ठेकेदारलाई ताकेता गरेको छ । ४ वर्षअघि ११ करोड रुपैयाँको लागतमा पक्की पुल निर्माणको काम सकेको रसुवा हिन्दुङ एन्ड ठोकर कन्स्ट्रक्सनलाई भत्किएको दुवै किनार मर्मत गर्न ताकेता गरेको हो ।

दुर्गममा रहेको बौदीकालिका बासिन्दा त्यही पुल हुँदै किनमेलका लागि दिनहुँ तनहुँ आउजाउ गर्नुपर्ने बाध्यता छ । आफ्नै जिल्लाको कावासोती बजार आउजाउ गर्ने सडक ठाउँठाउँमा भत्किएका कारण उनीहरू अप्ठेरोमा छन् । पुलको दुवै किनारमा तटबन्धन बनाएर यातायात सुचारु गर्न सडक कार्यालयले ठेकेदार कम्पनीलाई पत्र पठाएको छ । ‘तत्काल गाडी सुचारु गराउन सक्ने बनाउन १५/२० लाखको कामले हुन्छ,’ सूचना अधिकारी पौडेलले भने ।

बौदीकाली गाउँपालिकाका प्रमुख प्रशासकीय अधिकृत प्रदीपचन्द्र सुवेदीले पुलबाट आउजाउ हुन नसक्दा नाकाबन्दीमा परेकाले तत्काल पुलबाट यातायात सुचारु गर्न माग गरेको सुनाए । २ साताअघिको बाढीले पुललाई क्षतिग्रस्त बनाएको थियो । गाउँपालिका अध्यक्ष दुर्गाबहादुर रानाले मधेस र तनहुँ जान नपाएका कारण आफ्ना नागरिक उपचार पाउने सुविधावाट समेत वञ्चित भएको बताए । ‘न मधेस झर्न मिल्छ न तनहुँ जाने बाटो छ,’ उनले भने ‘गाउँपालिकाको बजेटले मर्मत गर्न नसकिने भएकाले सडक कार्यालयलाई गुहार मागेका छौं ।’