चितवन राष्ट्रिय निकुञ्जमा दश महिनामा अढाई लाख बढि पर्यटक, २२ करोड राजस्व संकलन

सन्जय भट्टराई, कावासोती । चालु आर्थिक वर्षको पछिल्लो १० महिनामा अढाई लाख बढी पर्यटकले चितवन राष्ट्रिय निकुञ्जको अवलोकन गरेका छन् । जंगल सफारीमार्फत २ लाख ७२ हजार ९ सय ४२ आन्तरिक तथा बाह्य पर्यटकले निकुञ्जको अवलोकन गरेका हुन् ।

चितवन राष्ट्रिय निकुञ्जका सहायक संरक्षण अधिकृत तथा सूचना अधिकारी गणेश तिवारीले चालु आर्थिक वर्षको पछिल्लो १० महिनामा २ लाख ७२ हजार ९ सय ४२ आन्तरिक तथा बाह्य पर्यटकले यहाँको अवलोकन भ्रमण गरेको बताए । पछिल्लो १० महिनामा निकुञ्ज भित्रिएका अढाईलाख बढी पर्यटकबाट २२ करोड रुपैयाँ भन्दा बढी राजस्व संकलन गरिएको उनले बताए ।

उनका अनुसार दस महिनाको अवधिमा १ लाख ६१ हजार ८ सय २७ नेपाली, सार्क मुलुकका २६ हजार ४ सय ६१ र ८४ हजार ६ सय ५४ अन्य मुलुकका पर्यटकले निकुञ्जको भ्रमण गरेका हुन ।

चितवन राष्ट्रिय निकुञ्जमा गत वर्ष तीन लाख बढी विदेशी तथा स्वदेशी पर्यटक आएको तिवारीले बताए । तिवारीका अनुसार गत वर्ष तीन लाख पर्यटकबाट ३० करोड रुपैयाँ राजस्व संकलन गरिएको जानकारी दिए । गत वर्षको तुलनामा यो वर्ष पर्यटक आगमनमा वृद्धि हुने निकुञ्जको अपेक्षा छ । “चितवन राष्ट्रिय निकुञ्जको वैशाखसम्मको पर्यटक आगमनको तथ्यांक हेर्दा अढाईलाख बढी पर्यटक प्रवेश गर्नुभएको छ । त्यसमा स्वदेशी तथा विदेशी पर्यटकहरू हुनुहुन्छ । राजस्व आम्दानीको हिसाबले चितवन राष्ट्रिय निकुञ्जले दस महिनामा २२ करोडभन्दा बढी राजस्व संकलन गर्न सफल भएको छ,” उनले भने ।

निकुञ्जमा गैँडा, पाटेबाघ, सोँस, गौरीगाई, काठेभालु, चितुवा, रतुवा, चित्तल, लगुना, जरायो, चौसिंगे, बाँदर र लंगुरलगायत ६० भन्दा बढी किसिमका स्तनधारी जंगली जनावर पाइन्छ । यस्तै, घडियाल गोही, मगर गोही, अजिंगरलगायत सरीसृप तथा उभयचर, बसाइँ सरी आएका र रैथाने गरी ५४६ भन्दा बढी जातका चराचुरुंगी र विभिन्न किसिमका किराफट्यांग्रा यहाँ पाइन्छ ।