चार दिनका लागि मनकामना केबुलकार बन्द हुने, यस्तो छ कारण
प्रकाशित : २०७८ पुष १ गते १२:०५
काठमाडौं । मनकामना केबुलकारको सेवा चार दिनका लागि बन्द हुने भएको छ ।
केबुलबार स्तरोन्नतिका लागि आगामी आइतबारदेखि चार दिनका लागि केबुलकार सेवा बन्द गर्ने मनकामना केबुलकारले जनाएको छ । जस अनुसार केबुलकारको सेवा पुस ४ गतेदेखि ७ गतेसम्मका लागि बन्द रहने छ ।
मर्मतसम्भार सकिएपछि पुस ८ गते बिहीबारदेखि केबुलकार सेवा नियमित हुने कम्पनीले जनाएको छ । उक्त अवधिभर केबुलकार बटम स्टेशन र रेष्टुराँ सेवा भने यथावत् रहने बताइएको छ ।
कम्पनीले केबुलकारमा प्रयोग हुँदै आएको एनालग कनेक्ट प्रणालीलाई डिजिटल प्रणालीमा स्तरोन्नति गर्न लागेको हो ।
लामो समयदेखि जडान गरिएको प्रविधि र उपकरणमा प्रयोग भएका स्पेयर पार्ट्सहरु पाउनै मुस्किल हुँदै गएपछि यसलाई स्तरोन्नति गर्न लागिएको कम्पनीले जनाएको छ ।
साथै केबुलकारको लठ्ठा र ग्रिप लगायत उपकरणहरु पनि स्तरोन्नति गर्ने जनाइएको छ । चालू आर्थिक वर्षदेखि नै केबुलकारलाई नयाँ प्रविधिमा लैजाने योजना कम्पनीको छ ।
कम्पनीका अनुसार केबुलकारको भवन, टावर, गोन्डोला, बुलह्वीललगायत उपकरण भने साविककै रहने छ । यो सबै स्तरोन्नति सम्पन्न भएसँगै मनकामना केबुलकार मुलुककै पहिलो डिजिटल कनेक्ट सिस्टमसहितको हुने छ ।
Facebook Comment