कावासोती
हुप्सेकोट ४ झ्यालबास स्थित ज्वाला मा.वि.ले श्रीमद्भागवत धन धान्याचल ज्ञान महायज्ञ संचालन गर्ने भएको छ ।
संस्कारसहितको गुणस्तरीय प्राविधिक शिक्षा सञ्चालन र सुविधा सम्पन्न भौतिक संरचना निर्माणका लागि मंसिर १७ गतेदेखि २३ गतेसम्म श्रीमद्‌भागवत तथा धनधान्याचल ज्ञान महायज्ञ संचालन गर्न लागेको यज्ञ मुल समारोह समितिका संयोजक अर्जुन पाण्डेले बताए ।

“स्थानिय ठाउँको पहिचान एवम् स्थानिय कला, संस्कृति, साहित्य, पर्यावरण तथा जैविक विविधताको संरक्षण एवम् सम्बर्धन गर्न, कक्षा ९ देखि १२ सम्म संस्कारयुक्त प्राविधिक शिक्षा कक्षा सञ्चालन गर्न,संस्कारयुक्त प्राविधिक शिक्षा प्रदान गर्न,विद्यालयको शैक्षिक, भौतिक विकास गर्न ज्ञान महायज्ञ संचालन गर्न लागिएको हो ” पाण्डेले भने ।

२० लाख खर्चको अनुमान गरिएको ज्ञान महायज्ञमा एक करोड बढी रकम संकलन हुने आकलन गरिएको छ । पाण्डेले चन्दादातालाई दैनिक विशेष सम्मानको कार्यक्रम रहेको बताउँदै बिध्यालयको चौतर्फी बिकाशका लागि सबै पक्षको सहयोग रहने बिश्वास ब्यक्त गरेका छन ।

बिध्यालयका प्रधानाध्यापक राजन गैरेले ज्ञान महायज्ञमा श्रीमद्भागवत महापुराण, मूल पाठपरायण, वेदपाठ, रुद्री, चण्डी पाठपरायण, हवन, कीर्तन एवम् तुलादान,संगीतमय भागवत कथा वाचन, लिलामय कथा श्रवण, प्रसङ्ग अनुसार झांकी, आरती र फूल प्रसाद वितरण, व्रतवन्ध, ग्रहशान्ति गर्नुका साथै तुलादान, भुमिदान, द्रव्यदान र दानवीरहरुलाई विशेष सम्मान सहित ग्रहशान्ति,लघुरुद्री,विवाह, चौरासी पूजा,कालसर्प दोषशान्ति, तुलादान,व्रतबन्ध शनिग्रह शान्ति, विशेष पितृउद्धार महाआरतीको ब्यवस्था गरिएको बताए ।

गैरेले ज्ञान महायज्ञको तयारी अन्तिम चरणमा पुगेको बताए । श्रीमद्भागवत धनधान्याचल ज्ञान महायज्ञको प्रमुख बाचक भागवतालङ्कार पदवीले विभुषित पं. श्री नेत्र प्रसाद पराजुलि रहेका छन ।