भारी वर्षाका कारण मुग्लिन नजिकको पहिरो फाल्न समस्या, गएरातिदेखि यात्रुहरू अलपत्र
प्रकाशित : २०७९ जेठ २६ गते ९:५६
नवलपुर । पृथ्वी राजमार्गको मुग्लिननजिक पहिरो खस्दा सवारी साधनहरू अलपत्र परेका छन् ।
बुधवार राति आएको अविरल वर्षाका कारण पहिरो खस्दा सवारी आवागमन ठप्प भएको इलाका प्रहरी कार्यालय मुग्लिनका इन्स्पेक्टर सुनदिप तामाङले लोकान्तरलाई जानकारी दिए ।
उनका अनुसार इच्छाकामना गाउँपालिका–४ स्थित नाग्दी खोलामा पहिरो खसेको छ ।
राति साढे ११ बजे आसपासमा खसेको पहिरो ठूलो वर्षा भएपछि बिहीवार बिहान साढे ६ बजेपछि मात्रै पन्छाउन शुरू गरिएको थियो ।
अविरल वर्षासँगै पहिरो खस्ने क्रम नरोकिएपछि पहिरो पन्छाउन सकिएको थिएन ।
बिहीवार बिहान करिब ९ः ४० पछि भने वर्षा केही कम भएको र पहिरो पन्छाउने क्रम शुरू गरिएको इन्स्पेक्टर तामाङले जानकारी दिए ।
उनले भने,‘बिहान ठूलो पानी परेपछि पहिरो पन्छाउन सकिएन । अहिले शुरू गरिएको छ । रातिदेखि यात्रुहरू अलपत्र छन् ।’
उनका अनुसार अब पानी ठूलो नपरेमा एक घन्टाभित्रमा पहिरो पन्छाएर एकतर्फी सवारी साधन चलाउन सकिनेछ ।
पहिरो गएको यो ठाउँ मुग्लिन र मनकामना केबुलकारको बीचमा पर्दछ ।
Facebook Comment