मन्त्री नै नभएका धनराजसँग सर्वाधिक मन्त्री भएका विजयको पराजय
प्रकाशित : २०७८ पुष १ गते ११:५८
नेपाली कांग्रेसको उपसभापतिमा कांग्रेस भित्रको ‘तेस्रो पुस्ता’बाट धनराज गुरुङले बाजी मारेका छन् । बुधवार मध्यरातमा सम्पन्न मतगणनामा कांग्रेसभित्र प्रभावशाली मानिएका विजय गच्छदारलाई पराजित गर्दै गुरुङ उपसभापति निर्वाचित भएका हुन् । अत्यन्त प्रतिस्पर्धात्मक निर्वाचनमा गुरुङले २ भोटले गच्छदारलाई पराजित गरे । धनराजले १ हजार ९०८ मत पाउँदा गच्छदारले १ हजार ९०६ मत प्राप्त गरे । मतगणनाका क्रममा शुरूआती अग्रता लिएका गुरुङलाई गच्छदारले बीचमा केही समय पछि पारेका थिए । उपसभापतिमा पूर्णबहादुर खड्काले २ हजार १२१ मत प्राप्त गरेका छन् । डा. शेखर कोइराला प्यानलबाट उपसभापतिका अर्का प्रत्यासी डा. चन्द्र भण्डारीले १ हजार ५८० मत प्राप्त गरेका छन् । गुरुङको विजयसँगै कांग्रेस पदाधिकारीमा डा. शेखर कोइराला प्यानलले खाता खोलेको छ । धनराजको विजयसँगै अन्य पदाधिकारीमा पनि मिश्रित नतिजा आउने सो प्यानलका नेताहरूले विश्वास गरेका छन् । महामन्त्री पदको मतगणना बिहीवार बिहानबाट हुँदैछ । महामन्त्रीमा गगनकुमार थापा, डा. मीनेन्द्र रिजाल, डा. प्रकाशशरण महत, प्रदीप पौडेल र विश्वप्रकाश शर्माबीच प्रतिस्पर्धा छ ।
को हुन् धनराज ?
जीवनमा कहिल्यै मन्त्री नबनेका धनराज गुरुङले सर्वाधिक पटक मन्त्री बनेका गच्छदारलाई पराजित गरे । स्याङ्जामा जन्मेका गुरुङले २०३६ सालदेखि नेपाल विद्यार्थी संघबाट राजनीति शुरू गरेका थिए । उनी २०५३ सालमा नेपाल विद्यार्थी संघको केन्द्रीय सभापति बनेका थिए । पछि उनी तरुण दलको महामन्त्री बनेका थिए ।
कांग्रेसको १२औं र १३औं महाधिवेशनबाट केन्द्रीय सदस्यमा निर्वाचित गुरुङ पहिलो संविधान सभामा सदस्य थिए । राष्ट्रियता, जनजीविका र सुशासनको मुद्दामा उनी प्रखर रूपमा बोल्दै आएका छन् ।
पार्टी प्रशिक्षणको क्रममा देशका प्रायः जिल्लामा घुमेका कारण उनी कार्यकर्तामाझ लोकप्रिय छन् । जिल्लामा घुमेको र प्रशिक्षणमा सहभागी भएका कारण कतिपयलाई आश्चर्य तुल्याउँदै गुरुङले उपसभापतिमा विजय हासिल गरे ।
गुरुङको विजयसँगै कांग्रेस नेतृत्वमा शेखर कोइराला प्यानलको आवाज बुलन्द हुने संकेत देखिएको छ । बुधवार यो प्यानलले प्रतिनिधिलाई धन्यवाद दिन आयोजना गरेको कार्यक्रममा पनि उनले कार्यकर्तालाई उत्साहित बनाउने भाषण गरेका थिए ।
उपसभापतिको मतगणनामा शुरूआती अग्रता लिएसँगै गुरुङ मतगणना भइरहेको पार्टी कार्यालयमा पुगेका थिए । उपसभापतिमा विजयी भएसँगै उनले आफू सबै कांग्रेसको उपसभापति भएको भन्दै गुटबन्दी बिर्सने बताएका छन् ।
कोइराला प्यानलबाट उपसभापतिमा उठेका भण्डारी भने पराजित भएका छन् ।
Facebook Comment