रोहितको कप्तानीमा न्युजिल्यान्डसँग खेल्दै भारत
प्रकाशित : २०७८ मंसिर १ गते १२:४३
नवलपुर । रोहित शर्माको कप्तानीमा भारतले आज न्युजिल्यान्डविरुद्धको सिरिजअन्तर्गत पहिलो ट्वान्टी–२० खेल खेल्दै छ । हालै विश्वकप क्रिकेटमा समूह चरणबाटै बाहिरिएको भारत न्युजिल्यान्डविरुद्ध मैदानमा उत्रिन लागेको हो ।
जयपुरमा भारतले विश्वकपमा न्युजिल्यान्डविरुद्ध व्यहोरेको हारको बदला लिने योजना बनाएको छ । विश्वकपको सुपर–१२ मा भारत न्युजिल्यान्डसँग ८ विकेटले पराजित भएको थियो ।
न्युजिल्यान्ड पनि आफ्ना कप्तान केन विलियमसनबिना नै मैदानमा उत्रनेछ । ट्वान्टी–२० विश्वकपको उपविजेता न्युजिल्यान्डले टेस्ट क्रिकेटका लागि विलियमसनलाई विश्राम दिएको हो ।
भारत र न्युजिल्यान्डबीचको दोस्रो ट्वान्टी–२० खेल आउँदो शुक्रबार र तेस्रो खेल आइतबार हुने तालिका छ । दुई टोलीबीचको टेस्ट सिरिज यही नोभेम्बर २५ तारिखबाट सुरु हुनेछ ।
आजको खेल नेपाली समयानुसार साँझ ७ बजेर १५ मिनेटमा सुरु हुनेछ ।
Facebook Comment