दुई महिनाभित्र होङ्सी सिमेन्टलाई विद्युत् दिइने
प्रकाशित : २०७८ असोज ५ गते १८:२७
नारायण शर्मा/नवलपरासी पूर्व — पूर्वी नवलपरासीको सर्दीमा चिनियाँ लगानीमा सञ्चालित होङ्सी सिमेन्टलाई दुई महिनाभित्रमा विद्युत् दिइने भएको छ । उद्योगका लागि निर्माण भइरहेको बर्दघाट–सर्दी १३२ केभी प्रसारण लाइन आयोजनाको निर्माणमा केही ढिला हुने भएपछि वैकल्पिक व्यवस्था गरी विद्युत् आपूर्ति गर्न लागिएको विद्युत् प्राधिकरणले जनाएको छ ।
प्राधिकरणका कार्यकारी निर्देशक कुलमान घिसिङले वैकल्पिक व्यवस्था गरेर भए पनि दुई महिनाभित्र विद्युत् आपूर्तिको प्रबन्ध मिलाइने बताएका छन् ।
कार्यकारी निर्देशक घिसिङले सिमेन्ट कारखाना उद्योगका पदाधिकारीसँग छलफल गरेर महिनाभित्र विद्युत् आपूर्ति दिन सकिने भएकाले कारखानाले पनि त्यसैअनुसार आवश्यक तयारी गर्न आग्रह गरेको बर्दघाट–सर्दी प्रसारण लाइन आयोजनाका प्रमुख हरि पाण्डेले बताए । पाण्डेका अनुसार भरतपुर–बर्दघाट २२० केभी प्रसारणलाइन निर्माण कार्य अन्तिम चरणमा रहेको छ । ‘कात्तिकभित्र उद्योगलाई लाइन दिइसक्छौँ,’ पाण्डेले भने ‘विद्युत् अभावमा कारखानाको उत्पादन क्षमतालाई असर गर्दैन ।’
३६ अर्ब रुपैयाँ लगानीको होङ्सी सिमेन्ट कारखाना नेपालको सबैभन्दा ठूलो सिमेन्ट कारखाना हो । दुम्कीवासबाट १० किलोमिटर उत्तरमा होङ्सी सिमेन्टको कारखाना रहेको छ ।
Facebook Comment