काबुलस्थित अमेरिकी दूतावासमा खटिएका ३ सय ८५ नेपालीको उद्धार, दोहा पुर्याइयो
प्रकाशित : २०७८ साउन ३२ गते १२:०७
काठमाडौँ — अमेरिकाले काबुलस्थित अमेरिकी दूतावासमा खटिएका नेपाली सुरक्षा गार्डहरुलाई उद्धार गरेको छ । उनीहरुलाई सोमबार बिहान उद्धार गरेर दोहा पुर्याएको हो । दूतावासमा ३ सय ८५ जना नेपाली सुरक्षा गार्ड कार्यरत थिए ।
दोहास्थित अमेरिकी बेस क्याम्प । काबुलबाट उद्धार गरिएकाहरुलाई अमेरिकाले यहाँ राखेको छ ।
अमेरिकाले काबुलस्थित युरोपियन युनियन डेलिगेट्सको कार्यालयमा खटिएका नेपाली सुरक्षागार्डहरुलाई उद्धार गरेर दोहा लगेको छ । उक्त कार्यालयमा ७४ जना नेपाली कार्यरत थिए । यी ७४ जना कामदारमध्ये कति जनालाई दोहा पुर्याइएको भन्नेबारे खुलेको छैन ।
उद्धार गरिएका नेपाली गार्डहरुलाई दोहास्थित अमेरिकी बेस क्याम्पमा राखिएको गुरुङले बताए । ‘नियमित उडान मार्फत उनीहरुलाई अमेरिकाले काठमाडौं पठाइदिने छ,’ गुरुङले भने ।
यसैगरी, अमेरिकी रक्षा मन्त्रालयले काबुलस्थित अमेरिकी दूतावासमा कार्यरत कर्मचारीलाई उद्धार गर्ने कार्य सफलतापूर्वक सम्पन्न भएको जनाएको छ । विज्ञप्तीमा भनिएको छ,‘दूतावासका सबै कर्मचारीहरुको सफल उद्धार भइसकेको छ । उनीहरु हमिद कारजाई अन्तर्राष्ट्रिय विमानस्थलको अमेरिकी सैन्य क्याम्पभित्र सुरक्षित छन् । ’
दूतावासमा कार्यरत कर्मचारी तथा सुरक्षागार्डहरुलाई हेलिकप्टरमार्फत हमिद अन्तर्राष्ट्रिय विमानस्थल पुर्याइएको थियो ।
तालिबान समूहले काबुल सहरलाई पनि पूर्ण रुपमा नियन्त्रणमा लिएको छ । केही पश्चिम देशका दूतावासका कर्मचारीहरु अझै काबुल सहरभित्रै रहेका छन् ।-ईकान्तिपुर
Facebook Comment