अर्जेन्टिना कोपा अमेरिकाको सेमिफाइनलमा
प्रकाशित : २०७८ असार २० गते १०:३२
रियो डि जेनेरियो — लियोनल मेसीले फ्रिकिकबाट एक गोल गर्दै अर्को दुई गोलमा सहयोगी भूमिका निभाएपछि अर्जेन्टिनाले कोपा अमेरिकामा आइतबार १० खेलाडीमा सीमित इक्वेडरलाई ३–० हराएको छ । यो जितपछि अर्जेन्टिना प्रतियोगिताको सेमिफाइनल पनि पुगेको छ ।
यस्तै अर्को खेलमा जित निकाल्नै कोलम्बियाले पनि अन्तिम चारको यात्रा तय गरेको छ । मेसीले फ्रिकिकबाट दोस्रो हाफको इन्ज्युरी समयमा गोल गरे । यसअघि ४० औं मिनेटमा रोडरिगो डे पउल र ८५ औं मिनेटमा लउटारो मार्टिनेजले गोल गरेका थिए ।
दुवै गोलमा मेसीले सटिक पास मिलाएका हुन् । यसअघि कोलम्बियाले टाइब्रेकरमा उरुग्वेलाई ४–२ ले हराएको थियो । निर्धारित समयको खेल गोलरहित बराबरीमा टुंगेपछि खेल टाइब्रेकरमा गएको हो । कोलम्बियाका तर्फबाट भएका सबै चार प्रहार गोलमा परिणत भएका थिए ।
उरुग्वेका चारमध्ये दुई प्रहार मात्र गोलमा परिणत भएको थियो । अब सेमिफाइनलमा डिफेन्डिङ च्याम्पियन ब्राजिलले पेरु र अर्जेन्टिनाले कोलम्बियाको सामना गर्नेछ ।
प्रकाशित : २०७८ असार २० गते १०:३२
Facebook Comment