काठमाडौं- देशका विभिन्न भागमा वर्षा जारी रहेकाले आज नदीहरुमा बाढीको जोखिम उच्च रहेको जल तथा मौसम विज्ञान विभाग अन्तर्गतको बाढी पूर्वानुमान महाशाखाले जनाएको छ।

बिहानको मापन अनुसार कर्णाली, महाकाली र यसका सहायक नदीमा बहाब स्थिर अवस्थामा रहेको छ। कोशी, नारायणी, बागमती र यसका सहायक नदीमा बहाब बढ्दो क्रममा रहेको तथा सबैमा बहाव सतर्कता तह भन्दा तलै छ। नारायणीको सहायक नदी मर्स्याङदी, बिमलनगर जलमापन केन्द्रमा जलसतह सतर्कता तह पार गरेको र बढ्दो क्रममा रहेको महाशाखाले जनाएको छ।

आज कर्णाली, महाकाली र यसका सहायक नदीमा बहाव सामान्य रहने, भोटेकोशी, सुनकोशी लगायत कोशीका सहायक नदीहरु तथा त्रिशुली, बुढिगण्डकी, कालिगण्डकी लगायत नारायणीका सहायक नदीहरुमा बहाव उल्लेख्य बढ्ने र केहीमा सतर्कता तह आसपास पुग्न सक्ने पूर्वानुमान छ।

आज पश्चिम राप्ती, बबईमा बहाब सामान्य रहने, पूर्वी राप्ती र कन्काई जलाधारका केही सहायक नदीहरुमा मध्यम देखि भारी वर्षा भई बहाब उल्लेख्य बढ्ने र सतर्कता तह पुग्न सक्ने पूर्वानुमान महाशाखाले गरेको छ। कमला र बागमती लगायतमा बहाब सतर्कता तह पार गरि खतरा तहसम्म पुग्न सक्ने पूर्वानुमान गरिएको छ।

आज प्रदेश १ को इलाम, झापा, मोरङ, सुनसरी, पाँचथर, उदयपुर, धनकुटा, भोजपुर, तेह्रथुम, ओखलढुंगा, ताप्लेजुङ, संखुवासभा, सोलुखुम्बु, प्रदेश २ को बारा, पर्सा, रौतहट, सर्लाही, महोत्तरी, धनुषा, सिराहा, सप्तरी, बागमती प्रदेशको काठमाडौ, धादिङ, मकवानपुर, चितवन, सिन्धुली, नुवाकोट, रसुवा, सिन्धुपाल्चोक, दोलखा, रामेछाप, काभ्रेपलाञ्चोक, गण्डकी प्रदेशको गोरखा, लमजुङ, तनहुँ, कास्की, स्याङ्गजा, म्याग्दी, पर्वत, बागलुङ, नवलपुर र लुम्बिनी प्रदेशको पाल्पा, गुल्मी, प्युठान, अर्घाखाँची, रोल्पा, दाङ र आसपास जिल्ला भई बहने स साना नदीजलाधारमा बहाव केही बढ्ने र केहीमा आकस्मिक वहाव भई सतर्कता आसपास पुग्न सक्ने पूर्वानुमान छ।