चौथो टेष्टमा भारत इनिङ्स र २५ रनले विजयी, वर्ल्ड टेष्ट च्याम्पियनसिपको फाइनलमा
प्रकाशित : २०७७ फागुन २२ गते १९:०६
२२ फागुन काठमाडौं । इङ्ल्याण्ड विरुद्धको चौथो टेष्टमा भारत एक इनिङ्स र २५ रनले विजयी भएको छ । इनिङ्स अन्तरको जितपछि भारतले चार खेलको सिरिज ३–१ ले जित्दै वर्ल्ड टेष्ट च्याम्पियनसिपको फाइनलमा समेत स्थान बनाएको छ ।
अब भारतले टेस्ट च्याम्पियनसिपको फाइनलमा न्युजिल्याण्डसँग खेल्नेछ ।
नरेन्द्र मोदी अन्तर्राष्ट्रिय क्रिकेट रंगशालामा भएको टेष्टमा भारतले तेस्रो दिनमै जित हात पारेको हो । इङ्ल्याण्ड दोस्रो इनिङ्समा १ सय ३५ रन जोड्दै अलआउट भएपछि भारतले एक इनिङ अन्तरको जित हात पारेको हो ।
इङ्ल्यान्डका लागि दोस्रो इनिङ्समा डान लरेन्सले सर्वाधिक ५० रन बनाए । यस्तै कप्तान जोय रुटले ३० रन जोडे । इङ्ल्याण्डलाई अलआउट गर्न भारतका अक्सर पटेल र रविचन्द्र आश्विनले ५–५ विकेट लिए ।
यसअघि भारतले पहिलो इनिङ्समा ३ सय ६५ रन बनाएको थियो । ऋषव पन्तले १ सय १ रन बनाएपछि भारतले पहिलो इनिङ्समा १६० रनको अग्रता बनाएको थियो ।
पहिलो इनिङ्समा इङ्ल्यान्डले २०५ रन बनाएको थियो ।
अब भारत र न्युजिल्याण्डबीच वर्ल्ड टेष्ट च्याम्पियनसिपको फाइनल जुनमा लर्डस्मा हुनेछ ।
Facebook Comment