क्रिकेट टीमको मुख्य प्रशिक्षकका लागि आवेदन खुला
प्रकाशित : २०७७ भदौ १८ गते १०:२७
काठमाडौं। नेपाल क्रिकेट संघ (क्यान) ले मूख्य प्रशिक्षकसहित महत्वपूर्ण पदका लागि आज आवेदन खुला गरेको छ।
मूख्य प्रशिक्षकका लागि विभिन्न व्यक्तिको नाम चर्चामा रहे पनि अन्तत: क्यानले खुला प्रतिस्पर्धामार्फत प्रशिक्षक नियुक्त गर्न लागेको हो। नेपालको प्रदर्शन निरन्तर ओरालो लागिरहेको अवस्थामा माघ अन्तिमदेखि टीम प्रशिक्षकविहीन बनेको थियो।
नेपालका लागि निकै महत्वपूर्ण मानिएको आइसीसी क्रिकेट विश्वकप लिग-२ प्रतियोगिता मुखमै तत्कालीन मूख्यप्रशिक्षक उमेश पट्वालले राजीनामा दिएका थिए। यसबीचमा भारतका मिथुन मनहास र लालचन्द राजपूतको चर्चा चलेको थियो।
मूख्यप्रशिक्षकबाहेक क्यानले जनरल म्यानेजर (जीएम), चिफ फाइनान्स अफिसर (सीएफओ), क्रिकेट म्यानेजर (सीएम) र स्थानीय प्रशिक्षकका लागि आवेदन खुला गरेको हो।
लामो समयको विवादपछि निर्वाचित क्यानले कार्यभार सम्हालेको ११ महीनापछि महत्वपूर्ण पदका लागि आवेदन खुलाएको हो।
Facebook Comment