बुटवल धागो कारखानामा निर्माण गरिएको काेरोना विशेष अस्पतालमा १६ चैतमा मृत्यु भएका बाबुराम थापाको शव अझै उठेको छैन । पाल्पा रब्दीकोट गाउँपालिका–५ घर भई रुपन्देहीको सैनामैना नगरपालिकामा अस्थायी रूपमा बस्दै आएका थापा १३ चैतमा अस्पताल भर्ना भएका थिए । वैदेशिक रोजगारीबाट फर्किएका थापामा कोरोनासँग मिल्दोजुल्दो लक्षण देखिएको भन्दै स्वाब परीक्षणका लागि काठमाडौं पठाइएको थियो । तर, रिपोर्ट नआउँदै उनको १६ चैतमा मृत्यु भएको थियो ।

कोरोनाको कारण मृत्यु भएको आशंकामा मृत्यु भएकाे दिन कोही पनि आफन्त अस्पताल आएनन् । मृत्यु भएको दोस्रो दिन भने उनलाई कोरोना नभएको रिपोर्ट आयो । 

आवश्यक स्वास्थ्य उपकरण र जनशक्तिको राम्रो प्रबन्ध नगरिएको स्थानमा राखेर उपचारमाहेलचेक््रयाइँ  गरेको भन्दै अहिले थापाकी श्रीमती रीताले मृत्युको कारण खुलाउन र क्षतिपूर्ति दिन माग गरेकी छिन् । मृत्युको कारण र क्षतिपूर्तिको व्यवस्था नभएसम्म शव नउठाउने पनि उनले स्पष्ट पारेकी छिन् । तर, लुम्बिनी प्रादेशिक अस्पतालका सूचना अधिकारी डा. विष्णु गौतमले पनि थापाको के कारणले मृत्यु भएको हो भन्ने थाहा पाउन नसकिएको बताए ।

कोरोना अस्पताल, प्रचार मात्रै बढी
कोरोना भाइरस (कोभिड– १९) संक्रमण देखिए उपचार गर्न भन्दै देशका विभिन्न स्थानमा कोरोना विशेष अस्थायी अस्पताल निर्माण भइरहेका छन् । यही क्रममा बुटवलमा पनि धागो कारखानाको भवनलाई काेरोना विशेष अस्पताल बनाइएको छ । तर, सेवा गुणस्तरीय बनाउनेबारे कुनै ठोस काम हुन सकेको छैन । जसका कारण आइसोलेसनमा राखिएका थापाको मृत्यु भएको भन्दै आलोचना भइरहेको छ ।

लुम्बिनी प्रादेशिक अस्पतालका अध्यक्ष सूर्यबहादुर भट्टराईले कोरोना विशेष अस्पतालमा विशेषज्ञसहितका डाक्टरहरू खटिएको दाबी गरे । कोरोना विशेष अस्पताल अझ व्यवस्थित बनाउनेतर्फ पनि काम भइरहेको उनको जिकिर छ । 

तातोपानीसमेत खान नपाई श्रीमानको मृत्यु भयो : श्रीमती रीता थापा
ज्वरो आएपछि उहाँ जचाउन बुटवल जानुभएको हो । उहाँले अस्पतालबाट राम्रो व्यवहार नभएको बताउनुभएको थियो । त्यहाँ तातोपानीसम्म दिएनन् भन्नुभएको थियो । तातोपानीसमेत नदिनेले अन्य हेरचाह के गरे होलान् । मेरो श्रीमानको उपचार नपाएरै ज्यान गएको हो । धेरै नै लापरबाही गरे । कोरोना भन्दै राम्रो हेर्दै हेरेनन् ।

कोरोना नै भएका भए पनि थुप्रै मान्छे सन्चो भएका छन् । उहाँ त्यस्तो सिकिस्त पनि हुनुहुन्थेन । राम्रो हेरचाह भएको भए उहाँ बाँच्नुहुन्थ्यो । त्यति टाठो मान्छेको उपचार नपाएर मृत्यु भएपछि हामी धेरै अन्यायमा परेका छौँ । यत्रो लापरबाही हुँदासमेत सरकारी निकायबाट सोध्ने काम भएको छैन ।

घरपरिवारको रेखदेख गर्ने, कमाउने नै उहाँ हुनुहुन्थ्यो । अस्पतालको लापरबाहीका कारण उहाँको मृत्यु भएको हो । अस्पतालले मृत्युको कारण खुलाएर क्षतिपूर्ति नदिएसम्म हामी शव बुझ्दैनौँ ।

नयाँ पत्रीकाको अनलाइन संस्करण बाट